July 28, 2011
අතීත කතාව
තවද එක සමයක්හි
අසමසම
කාන්තියෙන් අග්‍ර
සියලු තාරකාවන්ට අධිපති
කවීන්ට හිත කැමති
චන්ද්‍ර තෙම
තනිව අහස්කුස සරණ
කණමැදිරියක දැක
අනුකම්පා උපදවී .
මුළු අඳුරු අහසම එළිය කරන මට
බැරි මොකද මේ අසරණියට
සරණ වෙන්න !
බාරදී අහස මොහොතකට
හිතමිත්‍ර උදා තරුවට
රෑ බදුලු වෙසක් ගෙන
සපැමිණුනි මිහි මතට .
දුර කතර ගෙවාගෙන
පැමිණුනා ඈ අබියසට අන්තිමට .
කෙළවරයි කතාව .
සතුටින් හැමෝම මින් මත්තට .
මොන පිස්සුද .. .. .. ..
කතන්දර වල වත්
එහෙම දේ වෙන්නෙ නැත .
රෑ බදුල්ලා ඇසු විගස වගතුග
ගස්සා නිකට හෙමිහිට
ඈ කිව්වා මෙහෙම ,
මට වෙන වැඩ නැතිද
බිම බඩගාන
ඇඟ පුරා කකුල් ඇති අය එක්ක
කතා කරකර ඉන්න .
අර බලාපන් අහස
ඔය අහස පුරාවට ඉන්නේ
මා වගේම අය
මම මේ යන්නේ
ඉන් කෙනෙක් හම්බෙන්න .
වළාකුලකට මුවා වුනු හඳ
යළිත් ගගනත බැබලෙන්ට විය .
උදා තරු තෙම අහස කොනක හිඳ
කිව්වා මෙහෙම
මචං මතුපිටින් එන එලියට වඩා
ඇතුළතින් එන එළිය වෙනස් බං !
වර්තමාන කතාව
එදා සඳ මෙදා සඳමයි
එදා තරු මෙදා තරුමයි
එතකොට කණමැදිරියා
.. .. .. .. ... .. ...
මොන කණමැදිරියෙක්ද !
No comments:
Post a Comment